Гомель: куды ісці і што глядзець?

Гомельскі палацава-паркавы ансамбль

Гэта галоўная славутасць горада, якую ніяк нельга прапусціць. Комплекс складаецца з гарадзішча сярэдневяковага Гомеля, палаца Румянцавых-Паскевічаў, капліцы-пахавальні сям'і Паскевічаў, сабора Св. Пятра і Паўла, зімовага саду з вежай агляду і парку з Лебядзіным ставам. Такая колькасць славутасцяў затрымае турыста надоўга!

На тэрыторыі ансамбля сустракаюцца экзатычныя для нашай краіны расліны: чорная сасна, гінкга білоба, магноліі, язмін, кававае дрэва і іншыя. Каб уважліва разгледзець усё гэта, турысты забіраюцца на назіральную вежу і з 40-метровай вышыні ацэньваюць парк і ўвесь ансамбль у цэлым.

Сэрца гэтага комплексу – палац Румянцавых-Паскевічаў. Землі пад будаўніцтва гэтага палаца падаравала Кацярына II графу Румянцаву, затым ужо ў 1834 годзе ён быў выкуплены палкаводцам Паскевічам. Таксама тут праходзяць балі, канцэрты і выстаўляюцца экспазіцыі, што ажыўляе саму атмасферу палаца.

Музеі Гомеля

Калі Вы маеце намер працягнуць культурную праграму пасля Гомельскага палацава-паркавага комплексу – шматлікія музеі да вашых паслуг. Напрыклад, музей ваеннай славы, дзе падарожнікі даведаюцца пра ваенную гісторыю Гомеля з самых старажытных часоў да нашых дзён. На аснове музея ваеннай славы быў створаны яшчэ адзін музей – музей крыміналістыкі. Ён прысвечаны барацьбе са злачыннасцю на тэрыторыі горада ў ХХ стагоддзі і змяшчае экспанаты таго часу: зброю, амуніцыю, дакументы, матацыкл і іншыя рэчы.

З музеяў не па ваеннай тэматыцы – музей гісторыі друку і фатаграфіі, філіял Веткаўскага музея стараверства і народных традыцый, а таксама карцінная галерэя беларускага мастака Вашчанкі.

Цэрквы і храмы горада

У Гомелі ёсць унікальныя рэлігійныя будынкі – Ільінская царква і Свята-Мікольскі мужчынскі манастыр. Ільінская царква – гэта адзіны стараверскі храм Беларусі. Храм дзейнічаў нават за савецкім часам і перажыў вайну. Таксама лічыцца, што ў гэтую царкву прыязджаў маліцца Емяльян Пугачоў.

У адрозненне ад Ільінскай царквы, Мікольскі манастыр закрываўся падчас савецкай улады і быў адроджаны ў 1994 годзе сіламі гараджан. Зараз у манастыры некалькі рэліквій: абраз і мошчы святога Іаана Кармянскага, міратачывы абраз святога Мікалая.

Рака Сож

Падарожжа не можа абысціся без прагулкі, на якой можна палюбавацца прыгажосцю горада! Для гэтага мы прапануем прайсціся па набярэжнай ракі Сож, якая працякае праз увесь горад Гомель. У якасці назіральнай пляцоўкі турысты выкарыстоўваюць пешаходны Баўманскі мост.

Фантаны

Працягваючы прагулку па горадзе Гомелі, можна натрапіць на вялікую колькасць фантанаў. Нават на вакзале турыстаў сустракае фантан «Буслы». Самы знакаміты з іх – на плошчы Леніна. Ён складаецца з некалькіх фантанаў, што стварае адзіную кампазіцыю. Таксама па вечарах запальваецца падсветка, якая афарбоўвае струмені вады і надае фантану яшчэ больш прыгажосці.

Таксама цікавы фантан на плошчы Перамогі – фантан «Дзьмухавец», у парку «Фестывальны» – фантан «Русалачка» і шмат іншых. За такую разнастайнасць Гомель называюць сталіцай фантанаў Беларусі.

У Гомелі яшчэ шмат месцаў, куды варта зазірнуць. Кожны падарожнік знойдзе цікавыя менавіта яму месцы і прычыну, чаму варта вярнуцца ў горад яшчэ раз. Таму працягвайце адкрываць для сябе Беларусь разам з Belarus.Travel!