Дата публікацыі:
2 студзеня 2019
Самабытная палеская культура, якая складаецца з народных святаў, абрадаў, фальклору і рамёстваў захавалася і да нашых дзён на Прыпяцкім Палессі. Гэта ўнікальны рэгіён, які вывучаюць гісторыкі, этнографы і культуролагі.
Гомельская вобласць / Петрыкаўскі раён / аграгарадок Ляскавічы
Міжнародны фестываль этнакультурных традыцый «Кліч Палесся»
Культурная падзея
Самабытная палеская культура, якая складаецца з народных святаў, абрадаў, фальклору і рамёстваў захавалася і да нашых дзён на Прыпяцкім Палессі. Гэта ўнікальны рэгіён, які вывучаюць гісторыкі, этнографы і культуролагі. Палеская культура, нягледзячы на самабытнасць, гарманічна адаптуецца да сучасных умоў. Адным з самых яскравых яе праяўленняў стаў Міжнародны фестываль этнакультурных традыцый «Кліч Палесся» — падзея, у якой аб'ядналіся ўнікальныя беларускія традыцыі.
Фестываль, які праводзіцца раз у два гады, праходзіць на Палессі ўжо ў пяты раз. За гэтыя гады этнафэст «Кліч Палесся» стаў сапраўдным культурным брэндам Палескага рэгіёну. Ён аб'ядноўвае 8 раёнаў Гомельскай вобласці (Мазырскі, Нараўлянскі, Петрыкаўскі, Хойніцкі, Жыткавіцкі, Ельскі, Калінкавіцкі, Лельчыцкі), а таксама 3 раёны Брэсцкай вобласці (Столінскі, Лунінецкі, Пінскі). Па традыцыі ў фестывалі ўдзельнічаюць рамеснікі, майстры, творчыя калектывы. У 2018 годзе фестываль наведалі каля 20 000 гасцей з Беларусі, Польшчы, Украіны, Расіі.
Праграма фестывалю за гады яго правядзення набыла традыцыйны характар. Пачынаецца фестываль цырымоніяй узнагароджання прэміяй «Ганаровы Паляшук». Бронзавую статуэтку-сімвал уручаюць выдатным ураджэнцам Палескай зямлі. У 2018 імі сталі чэмпіён Алімпійскіх гульняў, байдарачнік Раман Петрушэнка і Пётр Астапчук — кіраўнік ансамбля «Выцінанка».
Асаблівасцю фестывалю з'яўляюцца выступленні народных тэатраў — батлеек. Таксама ў праграме: тэматычныя выстаўкі «Палескія брэнды» і «Фестываль кнігі і друку», пляцоўка «Кіно на траве» пад адкрытым небам, народныя традыцыйныя гулянні «Сярод вёскі карагод» і бытавыя танцы «Танчым па-даўнейшаму». У фармаце мерапрыемства праходзяць майстар-класы па джыгітоўцы, конкурс рыбаловаў, прагулкі на цеплаходзе па Прыпяці, паветранае шоу парашутаў і дэльтапланаў, гістарычная рэканструкцыя «Бітва эпох» з паказальным рыцарскім турнірам.
Не сумуюць на фестывалі і дзеці. Для маленькіх гасцей працуюць атракцыёны, а таксама арганізаваны гульні, язда на электрамабілях, плаванне на лодках і конях. Забаўляюць гасцей фестывалю аніматары і артысты беларускай эстрады. Тут таксама можна пакаштаваць стравы нацыянальнай беларускай кухні і набыць тэматычныя сувеніры на гандлёвых радах. Завяршае фестываль конкурс прыгажосці «Палеская прыгажуня». А ўвечары гасцей форуму традыцыйна чакае святочны феерверк.
Фестываль «Кліч Палесся» — яркая культурная падзея Беларусі. Яна сведчыць аб павазе беларусаў да сваёй культуры і жаданні захоўваць культурную спадчыну Палескай зямлі ва ўсёй яе разнастайнасці. Фестываль развіваецца з кожным годам. Ён раскрывае шматлікія бакі багатай беларускай культуры і прыцягвае да яе моладзь і гасцей краіны.