Славянскі базар у Віцебску

Спачатку фундатарамі фестывалю выступілі тры краіны: Беларусь, Расія і Украіна. Пазней права арганізацыі "Славянскага базару" цалкам перайшло да нашай Рэспублікі. Віцебскі форум мастацтваў на доўгі час стаў сімвалам культурнага адзінства і сяброўства паміж славянскімі народамі. Ужо больш за 30 гадоў ён спрыяе ўмацаванню духоўных сувязей, пашырэнню творчых даляглядаў, папулярызацыі і захаванню народных традыцый.

За гады свайго існавання фестываль трансфармаваўся ў найбуйнейшае культурнае мерапрыемства, вядомае як на постсавецкай прасторы, так і за яе межамі. Эмблемай міжнароднага фестывалю стаў адзін з неафіцыйных сімвалаў Беларусі – кветка валошкі, прадстаўленая ў выглядзе ноты.

Назва Віцебскага фестывалю мастацтваў цалкам адлюстроўвае яго сутнасць. "Славянскі базар" – месца, дзе сустракаюцца прадстаўнікі розных народаў, каб падзяліцца творчасцю, абмяняцца культурным досведам, прэзентаваць свае здольнасці, паспаборнічаць у майстэрстве.

Геаграфія мерапрыемства штогод пашыралася. За час існавання форума Віцебск наведалі дзеячы культуры і мастацтва з Чарнагорыі, Турцыі, Грузіі, Францыі, Нідэрландаў, Швейцарыі, Італіі і многіх іншых краін з розных частак свету.

Галоўная інтрыга фестывалю - конкурс маладых выканаўцаў. У склад журы конкурсу традыцыйна ўваходзяць выбітныя прадстаўнікі музычнага алімпу з розных краін. Сярод уладальнікаў гран-пры конкурсу ёсць выканаўцы, якія атрымалі шырокую вядомасць: Таісія Павалій, Пётр Ялфімаў, Максім Сапацькоў, пераможца Еўрабачання Руслана. Прызёрамі конкурсу былі Ірына Дарафеева, Дзіяна Гурцкая, Наталля Падольская, Аляксей Гоман.

Фестываль дае магчымасць раскрыцца і юным талентам – з 2003 года ў праграму ўключылі дзіцячы песенны конкурс.

Аднак "Славянскі базар у Віцебску" – гэта не толькі свята эстраднай музыкі. Ён аб'ядноўвае музычнае, тэатральнае, выяўленчае, кінематаграфічнае, народнае мастацтва. У межах штогадовага фестывалю адбываюцца:

• рок-канцэрты;
• вечары класічнай музыкі;
• паэтычныя чытанні;
• концэрты поп-выканаўцаў;
• джазавыя мерапрыемствы;
• харэаграфічныя шоу;
• канцэрты народнай музыкі;
• кінапаказы;
• тэатральныя прадстаўленні;
• выступленні комікаў;
• творчыя вечары вядомых мастакоў;
• мастацкія выстаўкі;
• паказы моды;
• кірмашы майстроў.

Акрамя Летняга амфітэатра, які змяшчае больш за шэсць тысяч гледачоў, фестывальныя мерапрыемствы адбываюцца ў палацы спорта, канцэртнай зале "Віцебск", гарадскім цэнтры культуры, на сцэне драмтэатра, на іншых пляцоўках горада. Цырымоніі адкрыцця і закрыцця фестывалю збіраюць неверагодную колькасць эстрадных зорак, вядомых дзеячаў мастацтваў і іншых важных гасцей.

У дні фестывалю Віцебск ператвараецца ў месца, якое цалкам жыве адчуваннем свята. Горад квітнее, паўсюль адчуваецца гасцінная атмасфера, якая аб'ядноўвае прыхільнікаў розных творчых напрамкаў. Святочныя мерапрыемствы пачынаюцца з самай раніцы і завяршаюцца позна ўвечары.

Што чакае гасцей фестывалю на "Славянскім базары ў Віцебску" ў 2023 годзе?

У 2023 годзе Віцебск чакае гасцей з 12 па 17 ліпеня. Сёлета праграма ўключае: гала-канцэрт "Зоркі рускага радыё", творчы вечар гурта "Аўра", канцэрт памяці кампазітара Ігара Лучанка, выступленні каманд Вышэйшай лігі КВЗ, творчы вечар спявачкі Ірыны Дарафеевай, сольныя канцэрты Д. Малікава, У. Праснякова, С. П'ехі, С. Лазарава, выступленні зорак рускай эстрады: В. Салтыкова, І. Бранявіцкай, Р. Аляхно, гуртоў "Горад 312", "Агата Крысці", "Смысловые галлюцинации", "На-На", "Дыскамафія" і іншых папулярных музычных калектываў. Гасцей "Славянскага базару" чакаюць традыцыйныя кірмашы, выстаўкі, творчыя вечары, музычныя і тэатральныя сустрэчы.

Патрапіць у Віцебск можна цягніком ці аўтобусам. Напярэдадні фестывалю беларуская чыгунка запускае ў Віцебск дадатковыя цягнікі. Білеты на фестывальныя мерапрыемствы можна набыць у канцэртных касах Мінска і Віцебска, а таксама праз Інтэрнет.