XXVII Міжнародны фестываль арганнай музыкі

У 1839-м, пасля ліквідацыі уніі, касцёл быў перададзены праваслаўным. У 1924 годзе царкву зачынілі і размясцілі ў ёй краязнаўчы музей.

Цяпер Сафійскі сабор уваходзіць у склад Полацкага гісторыка-культурнага музея. Музей быў адкрыты для наведванняў у 1987 годзе. Экспанаты музея расказваюць пра гісторыю архітэктуры самай старажытнай каменнай пабудовы на тэрыторыі сучаснай Беларусі, пра шматлікія перабудовы, рамонты і апошнюю рэстаўрацыю помніка. У Сафійскім саборы можна ўбачыць фрагменты мура ХІ стагоддзя, падмурак, які практычна цалкам захаваўся, а таксама фрэскавыя роспісы канца ХІ стагоддзя.

Канцэртная зала ў Сафійскім саборы, адкрытая ў 1983 годзе, разлічана на 304 месцы. Традыцыйна тут па нядзелях праводзяцца арганныя канцэрты ў выкананні салісткі канцэртнай залы, лаўрэата міжнароднага конкурсу, заслужанай артысткі Рэспублікі Беларусь Ксеніі Пагарэлай.

А таксама ў канцэртнай зале сабора, цудоўнай прыгажосці і дасканалай акустыкі, штогод праходзяць фестывалі старажытнай і сучаснай камернай і арганнай музыкі. Самы знакаміты з іх – фестываль «Званы Сафіі».

XXVII Міжнародны фестываль арганнай музыкі «Званы Сафіі», адна з найбуйнейшых падзей у галіне музычнага мастацтва Беларусі, пройдзе з 23 кастрычніка па 27 лістапада. Гэта будзе юбілейны 40-ы канцэрт у Сафійскім саборы. 

На час правядзення фестывалю, кожную восень, Полацк становіцца цэнтрам прыцягнення знатакоў жывой музыкі з розных куткоў Беларусі. А шматлікія госці і жыхары Полацка атрымліваюць асалоду ад гучання аргана ў выкананні знакамітых музыкантаў з розных краін. 

Праграма XXVII Міжнароднага фестывалю арганнай музыкі «Званы Сафіі» зачароўвае і інтрыгуе адначасова. Пераканайцеся самі!

Адкрываюць канцэртны сезон 23 кастрычніка заслужаная артыстка Рэспублікі Беларусь Ксенія Пагарэлая і ўладальніца каларатурнага сапрана, лаўрэат міжнародных конкурсаў і фестываляў, расійская спявачка Людміла Трацэўская. У праграме: Г. Фарэ, К. Сен-Санс, Ж. Бізэ, Л. Дэліб, Л. В'ерн, П. Флэтчар.

30 кастрычніка арганістка Сафійскага сабора Ксенія Пагарэлая і камерны аркестр «ЕЎРОПА-ЦЭНТР» пад кіраваннем Раіля Садыкава парадуюць сваіх прыхільнікаў яркай праграмай. А таксама разам з шэдэўрамі старажытнай музыкі прагучыць полацкая прэм'ера сачынення беларускага кампазітара Аляксандра Літвіноўскага – сюіта для струннага аркестра “Le Grand Cahier”. У праграме: І. К. Бах, А. Літвіноўскі.

6 лістапада выступіць расійскі дуэт аргана і голасу – Анастасія Быкава, у рэпертуары якой шырока прадстаўлены сачыненні І. С. Баха і яго папярэднікаў, музыка кампазітараў эпохі барока, рамантызму, XX стагоддзя, сачыненні рускіх аўтараў, камерная ансамблевая і вакальна-арганная музыка, і Святлана Белякова, якая зачароўвае сваім вакалам. У праграме: І. С. Бах, Г. Ф. Гендэль, А. Скарлаці, В. А. Моцарт, Л. В'ерн, Т. Альбіноні. 

13 лістапада прадставяць праграму «Рамантычная Францыя» вядучыя беларускія салісткі, лаўрэаты міжнародных конкурсаў арганістка Кацярына Нікалаева і флейтыстка Таццяна Кармазінава. У праграме: Л. В'ерн, Ф. Пуленк, С. Франк, Г. Фарэ, Ш.-М. Відор. 

20 лістапада прыхільнікі арганнай музыкі атрымаюць асалоду ад праграмы «Вялікія арганныя такаты» ў выкананні расійскага арганіста, клавесініста, кампазітара Фёдара Строганава. У праграме: Д. Букстэхудэ, Ш.-М. Відор, І. С. Бах, Л. Баэльман, А. П'яцола.

Завершыцца фестываль арганнай музыкі 27 лістапада канцэртнай праграмай «Два геніі: Вівальдзі і Бах» у выкананні расійскай арганісткі, піяністкі і клавесіністкі, а таксама лаўрэата расійскай прэміі «Арганіст года-2021» Марыі Блажэвіч. 

Полацкі арган на працягу многіх дзясяткаў гадоў пакарае музыкантаў і слухачоў сваім незвычайным голасам, прыгажосць і глыбіню якога падкрэслівае ўнікальная акустыка Сафійскага сабора. Падарыце сабе і сваім блізкім самыя яркія эмоцыі!