Адрас:
- Віцебская вобласць, Мёрскі раён, Віцебская вобласць, Балота Ельня
Менавіта ў верасні тут пачынаецца сезон збору журавін. Па запасах гэтых ягад мясцовае балота Ельня займае першае месца ў Беларусі. Ельня — самае буйное верхавое балота Беларусі (адно з найбуйнейшых у Еўропе), ТВП, рэспубліканскі заказнік і Рамсарскае ўгоддзе. Гэта месца начлегу для больш чым 4 000 шэрых жураўлёў і дзясяткаў тысяч гусей розных відаў, якія спыняюцца адпачыць на балоце Ельня падчас восеньскай міграцыі. Менавіта да ягад і птушак прыцягвае ўвагу фестываль.
Цікавыя факты пра журавіны
Англіская назва журавін (Cranberry) у перакладзе азначае «Жураўліная ягада». Такую назву далі журавінам амерыканскія перасяленцы. Доўгія, тонкія кветкі журавін нагадвалі перасяленцам галаву і дзюбу жураўля.
Родавая назва журавін паходзіць ад грэчаскіх слоў «oxis» — востры, кіслы і «coccus» — шарападобны, г.зн. даслоўна «кіслы шарык».
Добрыя саспелыя журавіны падскокваюць, калі падаюць на цвёрдую паверхню. Таму на англійскай мове іх таксама часам называюць Bounceberry.
Цікавыя факты пра жураўлёў
Шэры журавель — адна з найбуйнейшых птушак у Еўропе — вышыня да 140 см, размах крылаў — больш чым 2 метры.
Журавы начуюць на балоце, а днём сілкуюцца рэшткамі ўраджаю на навакольных палях у радыусе 20-30 км ад балота.
Будуюць гнёзды яны на зямлі, альбо ў забалочаных месцах з неглыбокай вадой.
Журавы злучаюцца ў пару на ўсё жыццё і круглы год трымаюцца адзін аднаго.
Сілкуюцца ягадамі, насеннем, насякомымі, малюскамі, іншымі дробнымі жывёламі і раслінамі.
Адлёт шэрых жураўлёў на зімоўку працягваецца ўвесь кастрычнік, а часам зацягваецца да лістапада.
Журавы выстройваюцца клінам і ляцяць зграямі, у дзённы час і звычайна на вялікай вышыні.
Зграі падчас восеньскага пералёту значна больш шматлікія, чым вясной.
Танцы назіраюцца ва ўсе сезоны года і могуць выконвацца як адзіночнай птушкай, так і парамі, і нават зграяй на гнездавой тэрыторыі, падчас кармлення на прыпынках і на месцах адпачынку.
Шэры журавель занесены ў Чырвоную кнігу Рэспублікі Беларусь з 1981 года.