Iгрышча «Ката пячы»

Як памятаюць захавальнікі традыцыі, «катоў пяклі» ў многіх сёлах Дзяржынскага раёна: Якутах, Грынкевічах, Скірмантава, Скарабагатаўшчыне, ... Чаму наогул кот? Пераемнікі традыцыі тлумачаць: «Кот — захавальнік шлюбу, сімвал сямейнага шчасця і дабрабыту, урадлівасці і пладавітасці. Таму гуляць у яго могуць як маладыя хлопцы і дзяўчаты, так і ўжо замужнія і жанатыя, дарослыя людзі — няўжо каму не хочацца, каб усё пладзіла і нараджалася і ў доме, і на агародзе? Наш кот — рыжы як сонейка, ён клапоціцца пра людзей, і чорнага ката, які сімвалізуе няшчасце, ён не любіць і праганяе прэч, каб нікому не шкодзіў і пары не разбіваў». У мінулым годзе скірмантаўскі кот пацвердзіў сваю славу і «звёў» яшчэ адну пару — Аляксандру і Дзмітрыя; маладыя людзі пазнаёміліся менавіта на свяце і вырашылі быць разам, а ў гэтым годзе зноў прыйшлі — за новай порцыяй сямейнага шчасця. Згодна з літаратурнымi крыніцамi, асноўным арэалам распаўсюджвання гульні з'яўляецца Мінская вобласць. Ёсць звесткі пра існаванне такога звычаю як каляднай гульні ў Вілейскім, Лагойскім, Бярэзінскім і Івянецкім раёнах. Але, акрамя таго, што «кошка» Скірмантава мае мясцовыя характэрныя асаблівасці, тут гэтая традыцыя захоўваецца і ў «жывым» побыце.