Філіл «Гальшанскі замак»

Гальшанскі замак канца XVI - пачатку XVII стст. – унікальны помнік архітэктуры, некалі найпрыгажэйшы замак Вялікага княства Літоўскага і Рэчы Паспалітай. Пабудаваны ён быў Паўлам Стэфанам Сапегам - падканцлерам ВКЛ, які выбітным ваенным і палітычным дзеячам свайго часу. Па сваёй кампазіцыі замак у Гальшанах нагадваў Мірскі, але быў цалкам пазбаўлены суровасці апошняга. Прамавугольны ў плане двор (65,4 х 57,4 м) быў акружаны двухпавярховымі жылымі карпусамі і трохпавярховымі шасціграннымі вежамі. У сярэдзіне паўночна-ўсходняга корпуса знаходзілася ўязная брама, завершаная таксама шасціграннай вежай. У замку, апроч жылля, знаходзіся гаспадарчыя памяшканні, парадныя залы. Роспісы на сценах і столях, дэкор камінаў, маляўнічыя кафляныя печы, вітражы на вокнах, дарагая мэбля стваралі ўрачыстае ўражанне пышнай магнацкай рэзідэнцыі. На працягу XVII - XVIII стст. замак неаднаразова быў пашкоджаны, аднаўляўся, перабудоўваўся. Наймацнейшыя разбурэнні прынесла замку ХХ стагоддзе, да нашага часу рэзідэнцыя Сапегаў дайшла толькі фрагментарна… З 2011 г. пачынаюцца работы па расчыстцы замкавых пабудоў і двара, кансервацыі і фрагментарнай рэстаўрацыі. 6 мая 2021 г. адбылося ўрачыстае адкрыццё музейнай экспазіцыі «Гальшанскі замак. Гісторыя і паданні», якая складаецца з 4-х раздзелаў: 1. «Легенды і паданні Гальшанскага замка» (падвал Паўночнай вежы); 2. "Гісторыя і архітэктура замка" (першы ярус); 3. "Быт уладальнікаў замка" (другі ярус); 4. «Сапегі - будаўнікі і ўладальнікі замка. Гальшанскі замак у перспектыве часу» (трэці ярус і аглядная пляцоўка). Тады ж распачаў працу філіял Ашмянскага краязнаўчага музея імя Ф.К. Багушэвіча «Гальшанскі замак». Сёння замак - месца актыўнага прыцягнення як жыхароў Беларусі, так і турыстаў з многіх замежных краін. Наведвальнікам замка прапануецца: аглядная экскурсія і шэраг тэматычных, квэст-гульні для дзяцей і дарослых, тэатралізаваная гульнявая праграма "Соф'я запрашае". Традыцыйнымі сталі «Вечары ў Соф'і Гальшанскай». 6 жніўня 2022 г. у чарговы раз адбыўся рэгіянальны фестываль сярэднявечнай культуры «Гальшанскі замак». У візіт-цэнтры замка наведвальнікам прапануецца разнастайная сувенірная прадукцыя, у тым ліку вырабы мясцовых умельцаў, а таксама кулінарны брэнд "Гальшанскі пернік", які выпякаецца па старажытным сакрэтным рэцэпце. Філіл «Гальшанскі замак» чакае Вас з аўторка па нядзелю (выхадны панядзелак) - з 10.00 да 19.00 без абеда. Адрас: Гродзенская вобл., Ашмянскі р-н, аг. Гальшаны, вул. Замкавая, д. 64а. Тэлефоны для даведак: 80159378008; 80159376752; 80159376753; Маб.: +375 29 1484376; +375 29 9165012