Адпачынак з сям’ёй у Беларусі

Агратурыстычны комплекс «EcoClub»

«EcoClub» складаецца з трох сядзіб: «Паляўнічая», «Кантры», «Рыбацкая». Як можна зразумець з назваў, кожная сядзіба мае сваю спецыфіку. «Паляўнічая» – для аматараў дзікай прыроды і палявання. Таму тут, пры жаданні, турысты атрымліваюць дапамогу ў арганізацыі паляўнічых тураў. «Кантры» размешчана на лясной паляне і мае дзве хаты: з лазняй і тэрасай, так што гэты варыянт падыдзе тым, хто шукае якасны і спакойны адпачынак на прыродзе. «Рыбацкая» – для сапраўдных аматараў рыбалкі, якую таксама дапамогуць арганізаваць.

Падарожнікі могуць папарыцца ў лазні або паплаваць у басейне ў залежнасці ад абранай хаты, а для дзяцей ёсць батут і пляцоўка для гульняў. Ёсць яшчэ шмат універсальных забаў: дартс, караоке, настольныя гульні і г.д.!

Адрас: в. Каптаруны, Пастаўскі раён, Віцебскай вобласці

Этнакультурны комплекс «Наносы Адпачынак»

Комплекс размешчаны ў нацыянальным парку «Нарачанскі», што ўжо настройвае турыстаў на прыгожыя краявіды. Для турыстаў ёсць два віды дамоў: абшчынны і мяшчанскі. Апошні – больш дарагі, але і з большымі выгодамі. У той жа час у абшчынных дамах ёсць падворак са свойскай птушкай, што можа асабліва парадаваць дзяцей.

Таксама тут можна скарыстацца паслугамі конна-спартыўнага клуба, яхт-клуба, пракату квадрацыклаў і самакатаў. А для адукацыйнай праграмы на тэрыторыі комплексу размешчана 6 музеяў. Так што ў «Наносы Адпачынак» не засумуеш!

Адрас: Мінская вобласць, Мядзельскі раён, в. Наносы, 2А

Цэнтр экалагічнага турызму «Станькава»

Адна з прычын прыехаць у «Станькава» – гэта заасад. Тут ёсць ламы і страусы, што даволі незвычайна, а таксама тыгры, яноты, зубры, паўліны і іншыя віды жывёл. Яшчэ з незвычайнага ў заасадзе – сяброўства паміж мядзведзіцай Васілісай і сабакам Анфісай. Турысты ходзяць па пешаходным маршруце, які дазваляе пазнаёміцца з паводзінамі і жыццём жывёл бліжэй.

Яшчэ ў «Станькава» ёсць ваенна-патрыятычны комплекс «Партызанскі лагер». Ён рэканструяваны па дакументальных крыніцах пра Вялікую Айчынную вайну, таму ў рэалістычнасці комплексу не варта сумнявацца. Тут ёсць штабная зямлянка камандзіра з радыёстанцыяй, друкарня, зброевая майстэрня, лясная школа і санчастка.

На тэрыторыі комплексу ёсць каняферма. Тут дарослыя могуць пракаціцца на кані, а дзеці – на осліку або поні. Летам для дзяцей надзімаюць горкі і ставяць батуты, а яшчэ можна ўзяць на пракат ровар ці ролікі, таму тут будзе лёгка знайсці, чым заняцца.

Адрас: в. Станькава, Дзяржынскага раёна, Мінскай вобласці 

Аграсядзіба «Дом качэўніка»

Калі ў вас ёсць жаданне даведацца, як жылі качэўнікі, то вам трэба ў гэтую сядзібу! Яна ўнікальная тым, што тут можна ўбачыць мангольскія і бурацкія юрты і пранікнуцца культурай качавых народаў. А дапаможа ў гэтым экскурсавод, апрануты ў нацыянальны строй.

Яшчэ адзін прыемны бонус аграсядзібы: яе ахоўваюць сабакі самай прыязнай пароды – хаскі! Пра гісторыю гэтай пароды вы даведаецеся ад экскурсавода, а яшчэ можаце пагладзіць гэтых ахоўнікаў, пагуляць з імі, а таксама зрабіць памятныя фотаздымкі.

У Беларусі ёсць шмат варыянтаў для адпачынку. І нават калі трэба ўніверсальнае рашэнне, вы ўсё адно знойдзеце, куды з’ездзіць. Мы расказалі ўсё пра чатыры месцы і спадзяёмся, што, наведаўшы іх, вы туды вернецеся яшчэ раз!

Адрас: в. Касцюкі, Барысаўскага раёна, Мінскай вобласці