Дата публікацыі:
30 жніўня 2022
Як жа цудоўна з'ехаць ад гарадской мітусні, змяніць абстаноўку і ўз'яднацца з прыродай роднага краю. Аграсядзібы − гэта выдатная магчымасць файна прабавіць свае выхадныя, забыўшыся на праблемы. Сёння мы раскажам вам пра аграсядзібы, размешчаныя ў «азёрным краі» Беларусі, у Віцебскай вобласці.
«Жамчужны край»
Цудоўная аграсядзіба ў нацыянальным парку «Нарачанскі» размешчана прама каля возера Балдук. У кошт пражывання ўжо ўваходзіць арэнда лодкі і веласіпедаў. Таксама побач з домам праходзіць экалагічная сцежка па Блакітных азёрах, па якой вельмі любяць гуляць турысты. Што да самой хаты, то можна з упэўненасцю сказаць, што выхадныя тут падараць вам прыемныя эмоцыі, бо тут ёсць усё, што неабходна для выдатнага баўлення часу!
«Беларускі Байкал»
Аграсядзіба ўяўляе сабой двухпавярховы катэдж, дзе вы можаце камфортна прабавіць час з блізкімі людзьмі, адпачыць і атрымаць асалоду ад мясцовага каларыту. Выдатны дом знаходзіцца ўсяго за 50 метраў ад самага глыбокага возера Беларусі. Яно мае назву Доўгае. Штогод сюды прыязджаюць турысты-аматары дайвінгу.
Добра ў аграсядзібе ў любую пару года! Улетку вас пацешыць альтанка, дзе можна зладзіць пікнік, уласны пірс на возеры. Узімку кожнаму будзе ўтульна, бо ў хаце ёсць камін, які створыць рамантычную атмасферу. Ну і, вядома ж, тэраса з відам на возера з'яўляецца сапраўднай разыначкай дома.
Арт-вёска «Каптаруны»
Зусім недалёка ад мяжы з Літвой знаходзіцца дзіўны аб'ект для адпачынку. Арт-вёска «Каптаруны» заўсёды рада бачыць гасцей. Тэрыторыю, на якой размяшчаецца комплекс, мясцовыя называюць Беларускай Швейцарыяй.
Сапраўды, цяжка паспрачацца з прыгажосцю Блакітных азёр. Яны славяцца вялікай глыбінёй і празрыстасцю вады. Бліжэйшы водны аб'ект знаходзіцца за 400 метраў. За дадатковую плату гасцям гатовы арганізаваць трохразовае харчаванне або экскурсію па славутасцях. Дарэчы, дом аграсядзібы мае цудоўны інтэр'ер.
«Хутар Воўк»
Аўтэнтычная сядзіба, якая захавалася з 1918 года. Пражыванне тут спалучае сучасны камфорт з антуражам пачатку XX стагоддзі. Менавіта ў гэтым месцы абяцаюць лазню ў найлепшых беларускіх традыцыях і нацыянальную кухню.
У кожнай будынку ёсць тры асноўныя памяшканні: сенцы, хата і камора. Туалет і душавая кабіна знаходзяцца ўнутры, таксама ёсць свая міні-кухня. У арэнду ўваходзіць трохразовае харчаванне. Але самай галоўнай перавагай аграсядзібы з'яўляецца крыніца з найчысцейшай вадой! З мясцовым краязнаўцам Францам Хомічам арганізуюцца цікавыя экскурсіі.
«Запаветны востраў»
Выдатная сядзіба, якая размясцілася паміж трох азёр. На тэрыторыі ёсць альтанкі для адпачынку, мангалы, міні-заапарк і дзіцячыя забаўкі. Абсалютна дакладна можна сказаць, што тут ваш адпачынак будзе камфортным і разнастайным! Ёсць лодка і сапборды, веласіпеды і нават сыраварня.
Гасцінны персанал забяспечыць вам добрае харчаванне і найлепшае абслугоўванне. Зусім недалёка знаходзіцца стайня, дзе вас з радасцю пакатаюць вярхом на статных конях. Таксама мясцовасць славіцца сваімі дарамі: многія расказваюць пра неверагодны ўлоў, а нехта − пра грыбы і ягады, якімі поўняцца тутэйшыя лясы.
Жадаем вам прыемнага адпачынку ў Віцебскай вобласці! Адпачніце, уз'яднайцеся з прыродай, выкупайцеся ў цудоўных беларускіх азёрах і проста прабаўце час з сям'ёй і блізкімі.