Дата публікацыі:
3 студзеня 2019
Гэта адзін з самых буйных забаўляльных комплексаў падобнага роду ў СНД і пяты па велічыні ў Еўропе. Аквапарк знаходзіцца ў экалагічна чыстай зоне каля ўнікальнага біялагічнага заказніка «Лябяжы» і пабудаваны ў стылі закінутага ляснога свету з лагунамі, цяснінамі і гротамі. Гэта робіць яго адным з самых папулярных месцаў адпачынку ў Мінску
Мінск / праспект Пераможцаў, 120
Аквапарк «Лябяжы»
Аквапаркі і паркі забаў
Аквапарк «Лябяжы», які размешчаны ў Мінску на праспекце Пераможцаў, 120 каля вадасховішча Дразды, з'яўляецца першым у Беларусі паркам водных забаў. Гэта адзін з самых буйных забаўляльных комплексаў падобнага роду ў СНД і пяты па велічыні ў Еўропе. Аквапарк знаходзіцца ў экалагічна чыстай зоне каля ўнікальнага біялагічнага заказніка «Лябяжы» і пабудаваны ў стылі закінутага ляснога свету з лагунамі, цяснінамі і гротамі. Гэта робіць яго адным з самых папулярных месцаў адпачынку ў Мінску.
Аквапарк быў адкрыты ў маі 2014 года. Гэта сучасны комплекс на пяць узроўняў плошчай больш за 32 тысячы м², які спалучае як закрытую, так і адкрытую акваторыі. Тут ёсць нават сапраўдная дагістарычная сажалка з падземнай крыніцай, якая з'яўляецца прыродным помнікам. Гэты старажытны вадаём захавалі падчас будаўніцтва аквапарку і гарманічна ўпісалі яго ў экстэр'ер.
Дызайн аквапарка зроблены ў сучасным стылі «тэхна». У будаўніцтве і афармленні комплексу выкарыстоўваліся арыгінальныя сучасныя матэрыялы, у тым ліку і натуральныя. Тут выкарыстоўваюцца прыстасаванні, якія штучна нагнятаюць хвалі, а таксама экраны, светлавыя і гукавыя сістэмы. Ёсць і добраўпарадкаваная набярэжная з пірсам.
Аквапарк «Лябяжы» — гэта цэлы комплекс для забаў і адпачынку:
· Парк водных забаў;
· Тэрмальная зона, прадстаўленая 7-ю разнавіднасцямі лазняў і саунаў;
· SPA-зона, якая прапануе разнастайныя аздараўленчыя і расслабляльныя працэдуры;
· Трэнажорная зала на 630 м² і фітнес-цэнтр;
· Дзіцячы цэнтр «КаZki»;
· Зона пляжных вечарынак: клуб «Тэрасы» з фуршэтнымі зонамі;
· 7D атракцыён «DarkRide»;
· Сёрфінг-трэнажор Flowrider і атракцыён «Дажджавы грот»;
· Канатная рэверсіўная дарога;
· Пракат катамаранаў на летнім пірсе і бочка афура;
· Фуд-зона: 7 бараў (у тым ліку фітабар), рэстаран хуткага харчавання Country Chicken, 3 кавярні;
· Гасцінічны комплекс, які пачынае працаваць у зімовы час.
Закрытая зона аквапарку абсталявана 7-ю воднымі горкамі, самая высокая з якіх дасягае 20 метраў. Спускацца па іх можна як з дапамогай надзіманых кругоў і плытоў, так і без усялякіх прылад. Адкрытая зона абсталявана 4 горкамі да 15 метраў у вышыню. Самая доўгая горка аквапарку — 200 метраў, а агульная працягласць усіх горак складае больш за 1 км. Любы наведвальнік можа выбраць найбольш аптымальны для сябе спуск, каб ацаніць свае сілы альбо паказытаць нервы кропелькай экстрыму.
Аквапарк прымае да 6700 чалавек у дзень, а ў летні перыяд — да 7800 чалавек у дзень.
Тэмпература вады ў аквапарку падтрымліваецца на ўзроўні 28-34 °С. Самая нізкая — 16 градусаў — у халоднай купелі, а самая высокая — 34 °C — у джакузі. Тут таксама створаны ўмовы і для людзей з абмежаванымі магчымасцямі: уся тэрыторыя аквапарку абсталявана спецыяльнымі пандусамі, ліфтамі, поручнямі і нават ліфтам для апускання ў ваду.
Каб трапіць у аквапарк «Лябяжы», трэба набыць бранзалет з чыпам. Ён дазваляе наведваць розныя зоны і выступае як сродак аплаты. Купіць яго можна ў аквапарку і праз інтэрнэт.
Час працы: з 09.00 да 23.00 (акваторыя)