Дата публікацыі:
31 кастрычніка 2023
Даходны дом купца Лейбы Маянца – адзін з тых архітэктурных помнікаў, якія фарміруюць індывідуальны выгляд Гомеля.
Ён размешчаны ў цэнтры горада – на рагу вуліц Савецкай і Камунараў (былых Румянцаўскай і Мясніцкай). Дом быў пабудаваны ў 1894 годзе ў стылі мадэрн. Дагэтуль ён уражвае цікавым афармленнем і яркім знешнім дэкорам у белых і цагляных тонах. Фасады будынка ўпрыгожаны каванымі балконамі і ляпнымі элементамі ў псеўдарускім стылі. Трохпавярховы дом, пры будаўніцтве якога выкарыстаны самыя актуальныя на той час архітэктурныя прыёмы, выдатна перадае дух дарэвалюцыйнай эпохі і ўвасабляе тагачасныя стылявыя павевы.
У канцы XIX стагоддзя ў Гомелі жыло шмат яўрэяў. Ім належалі гандлёвыя крамы, рамесныя майстэрні, маленькія прадпрыемствы, даходныя дамы – жылыя будынкі, прызначаныя для здачы кватэр у арэнду. Дзякуючы адмене прыгоннага права і актыўнаму будаўніцтву чыгункі у Гомелі склаліся спрыяльныя ўмовы для развіцця прадпрымальніцтва. Даходныя дамы, якія належалі яўрэйскім купцам, сталі сапраўднымі помнікамі беларускай дарэвалюцыйнай архітэктуры. У той час будынкі нумараваліся рэдка, часцей іх называлі ад імя ўладальніка. У Гомелі знаходзіліся дамы Якава Лаўянава, Давіда Захар'ева, Лейбы Маянца.
У даходным доме Лейбы Маянца арэндныя кватэры займалі трэці паверх. На другім паверсе знаходзіліся памяшканні педагагічных курсаў, на першым размяшчаліся аптэка, юрыдычная кантора, слясарная майстэрня, гандлёвыя крамы, у тым ліку вінная крама, якая належала самому прадпрымальніку.
Пасля рэвалюцыі даходныя дамы былі канфіскаваны дзяржавай. На другім паверсе дома, які належаў Лейбе Маянцу, дзейнічала школа. На першым паверсе была размешчана крама з прамысловымі таварамі. Будынак дзівам не быў пашкоджаны падчас Вялікай Айчыннай вайны. Пасля вайны першых паверх быў перададзены паштоваму аддзяленню, якое доўгі час выконвала функцыі гарадскога глаўпаштамта.
Сёння будынак даходнага дома Лейбы Маянца знаходзіцца ў выдатным стане, тут размешчана адно з гомельскіх аддзяленняў «Белпошты». Пад час шпацыру ад гомельскага парку па вуліцы Савецкай немагчыма не заўважыць гэты знакаміты архітэктурны аб'ект, які дазваляе ўявіць, як выглядаў цэнтр горада над Сожам на мяжы XIX-ХХ стагоддзяў.
