Гістарычны комплекс «Старажытны Тураў»

У розныя часы Туравам кіравалі выдатныя палітычныя і ваенныя дзеячы: прадстаўнікі дынастыі Рурыкавічаў, літоўскі ваеначальнік Міхал Глінскі, вялікі гетман ВКЛ Канстанцін Астрожскі.

Доўгая і багатая гісторыя горада не магла не пакінуць нашчадкам цікавых артэфактаў і напамінаў пра старажытныя падзеі. Гістарычныя скарбы Турава прадстаўлены ў мясцовым краязнаўчым музеі, дзе можна пабачыць старажытныя кнігі, прылады працы, прадметы побыту, знойдзеныя пры раскопках. Частка музея – гістарычны комплекс "Старажытны Тураў", узведзены на Замкавай гары, на месцы разбуранага хрысціянскага сабора. Паводле гістарычных звестак, царква была пабудавана ў сярэдзіне XII стагоддзя, але манументальны будынак не вытрымаў моцнага землятрусу, які адбыўся ў пачатку XIII стагоддзя. Руіны храма, знойдзеныя пры раскопках гарадзішча, сведчаць пра тое, што гэта быў найбольшы рэлігійны будынак на заходніх землях Старажытнай Русі.

Комплекс "Старажытны Тураў" прадстаўляе сабой вялікую пляцоўку з рэшткамі падмурка старажытнага храма, накрытую шкляным купалам. У межах экспазіцыі прадстаўлены розныя гістарычныя і археалагічныя аб'екты:

• макет старажытнага Турава;
• прадметы побыту: гліняны посуд, жорны і іншыя рамесніцкія вырабы;
• старажытная зброя;
• элементы ўпрыгажэнняў;
• прылады працы;
• рэшткі адшуканага гарадзішча.

У межах экскурсіі наведнікам комплексу раскажуць пра гістарычнае мінулае Тураўшчыны, знакавыя падзеі ў гісторыі горада і яго славутых жыхароў. У сувенірнай краме можна набыць магніты з выявай Турава і іншыя памятныя сувеніры.

Экспазіцыя працуе штодня, акрамя панядзелка. Дабрацца да Турава са сталіцы можна на аўтамабілі па дарозе Р-23. З Гомеля ў горад ходзяць рэйсавыя аўтобусы і маршрутныя таксі. Абавязкова агледзьце ў Тураве іншыя гістарычныя каштоўнасці старажытнага горада: загадкавыя каменныя крыжы, якія, паводле легенды, прыплылі сюды па рацэ ў год хрышчэння Русі, царкву Усіх Святых – двухсотгадовы помнік драўлянага дойлідства, прыродны заказнік "Тураўскі луг".