«Кліч Палесся»: беларускія традыцыі як сіла прыцягнення

Фестываль ужо паспеў стаць брэндам не толькі нацыянальнага парку «Прыпяцкі» – цяперашні «Кліч Палесся» сабраў больш за 10 раёнаў Брэсцкай і Гомельскай абласцей. Кожны з рэгіёнаў падрыхтаваў сваю ўнікальную праграму. Ельскі раён завівае бараду і прыцягвае ўдачу, Жыткавіцкі жэніць комін, Лунінецкі водзіць Кусту, Хойніцкі раён ведае ўсё аб абярэгах ад русалкі... І гэта толькі невялікая крыха таго, чым багаты «Кліч Палесся».

Дыялогавая пляцоўка «Кропкі росту рэгіянальнага турызму» выклікала сапраўдную цікавасць з боку ўдзельнікаў семінара. З прывітальным словам выступіў намеснік Міністра спорту і турызму Алег Андрэйчык, які адзначыў, што 1,8 млн. арганізаваных беларускіх турыстаў падарожнічалі па нашай краіне ў 2023 годзе, што стала рэкордам нават у параўнанні з 2019-м. Сёння мы назіраем павышаны попыт на многія віды турызму, у тым ліку ў рэгіёнах. Гасцініцы буйных гарадоў і санаторыі краіны загружаныя на 100%: нумары распрададзены да канца года. У гэтых умовах важна надаць увагу стварэнню новых рэгіянальных турпрадуктаў і стымуляванню бізнесу на інвеставанне ў турыстычную інфраструктуру.

Начальнік упраўлення спорту і турызму Гомельскага аблвыканкама Павел Старасвецкі распавёў пра асаблівасці развіцця рэгіянальнага турызму і прасоўвання турпрадукту праз прадуманую арганізацыю падзейных мерапрыемстваў на прыкладзе фестывалю «Кліч Палесся». Асаблівую ўвагу ён надаў механізмам манетызацыі падзейных мерапрыемстваў.

Удзельнікі дыялогавай пляцоўкі абмеркавалі спецыфіку фарміравання рэгіянальнага турпрадукту, механізмы вызначэння ключавых відаў турызму ў рэгіёне, пытанні арганізацыі работы з транзітнымі патокамі турызму. Дыскусія прайшла ажыўлена і плённа.