Дата публікацыі:
2 студзеня 2019
Штогод у кастрычніку-лістападзе пад скляпеннямі знакамітага Сафійскага сабора ў Полацку праходзіць Міжнародны фестываль арганнай музыкі «Званы Сафii». У рамках гэтай падзеі ў Полацк прыязджаюць знакамітыя музыканты з розных краін свету: Расіі, Польшчы, Германіі, Швецыі, Японіі і іншых.
Віцебская вобласць / г. Полацк / вул. Замкавая, 1, Сафійскі сабор
Міжнародны фестываль арганнай музыкі «Званы Сафii»
Культурная падзея
Штогод у кастрычніку-лістападзе пад скляпеннямі знакамітага Сафійскага сабора ў Полацку праходзіць Міжнародны фестываль арганнай музыкі «Званы Сафii». У рамках гэтай падзеі ў Полацк прыязджаюць знакамітыя музыканты з розных краін свету: Расіі, Польшчы, Германіі, Швецыі, Японіі і іншых. Гэта вельмі яркая і важная культурная падзея Беларусі, якая знаёміць публіку з класічнай музычнай спадчынай і папулярызуе выканальніцкае майстэрства беларускіх музыкантаў.
Сафійскі сабор знакаміты далёка за межамі Беларусі. Гэта помнік архітэктуры XI-XVIII стагоддзяў, а таксама самая першая мураваная пабудова на тэрыторыі краіны, на сцяне якой знаходзіцца копія вядомай фрэскі Леанарда да Вінчы «Тайная вячэра». Таксама сабор з'яўляецца сардэчным гаспадаром шматлікіх фестываляў старажытнай і сучаснай камернай і арганнай музыкі. Фестываль «Званы Сафii» праходзіць у полацкім Сафійскім саборы з 1996 года. За гэты час у Сафійскім саборы выступілі сотні выканаўцаў з сусветнымі імёнамі. Гэта арганісты, хоры, ансамблі, класічныя спевакі і спявачкі, якія прадстаўляюць розныя школы і выступаюць у розных стылях. Акрамя таго, на фестываль з'язджаюцца верныя паклоннікі арганнай музыкі, якія не могуць прапусціць мерапрыемства такога ўзроўню. Арганізатарамі форуму з моманту яго заснавання выступаюць Аддзел культуры Полацкага гарвыканкама і арганістка канцэртнай залы Сафійскага сабора Ксенія Пагарэлая.
Ксенія Пагарэлая з'яўляецца тытулаваным арганістам канцэртнай залы Сафійскага сабора з 1988 года і сярод сваіх шматлікіх узнагарод мае і медаль Францыска Скарыны за дасягненні ў галіне культуры. У 2015 годзе яна выступіла нават у легендарным саборы Нотр-Дам у Парыжы.
У 2018 годзе ў праграме фестывалю было 6 музычных блокаў у розных музычных жанрах. Канцэртныя праграмы прадстаўлены, як правіла, не толькі класічнымі творамі, але і кампазіцыямі для аргана з аркестрам, транскрыпцыямі і імправізацыямі. Пад скляпеннямі Сафійскага сабора штогод гучаць творы такіх сусветных класікаў, як Бах, Моцарт, Альбіноні. А выконваюць вядомыя творы знакамітыя музыканты: выдатны нямецкі арганіст, прафесар Ёганэс Геферт, уладальніца цудоўнага сапрана Сюзана Ютц-Мільчыцкая, аўстрыйскі арганіст Трумер, фінскі арганіст-імправізатар Пірханен, беларускі камерны аркестр «Еўропа-Цэнтр», Дзяржаўны струнны квартэт імя Глінкі з Расіі, датчанін Ганс Хрысціян Хэйн і іншыя. Дзякуючы выступленням музыкантаў жыхары і госці Полацка могуць пазнаёміцца з арганным мастацтвам розных краін.
Сапраўдным падарункам для ўсіх беларускіх паклоннікаў арганнай музыкі стала выкананне ў 2018 годзе ў сценах Сафійскага сабора сюіты «Францыск Скарына», якая была напісана кампазітарам Ганнай Кароткінай, якая ў сваёй творчасці заўсёды дэманструе вобразы беларускіх асветнікаў.