Мінскі трактарны завод з'яўляецца сапраўдным калосам сярод сабе падобных. Гэта прадпрыемства ўваходзіць у 8-ку найбольш буйных сусветных вытворцаў сельскагаспадарчай тэхнікі і займае каля 8-10% сусветнага трактарнага рынку. Штогод з канвеера завода сходзіць больш за 60 мадэляў на сотні варыяцый для любых кліматычных умоў. На ўсіх кантынентах больш, чым у 100 краінах свету, шмат гадоў працуюць трактары маркі «Беларус», паспяхова спраўляючыся са сваёй працай і заваёўваючы ўсё большую папулярнасць.
Гістарычная даведка. Мінскі трактарны завод быў заснаваны ў маі 1946 года на базе недабудаванага авіяцыйнага завода. У 1947 годзе яго будаўніцтва было анансавана ўсесаюзнай ударнай будоўляй. 14 кастрычніка 1953 года ва ўрачыстай абстаноўцы з канвеера сышоў першы серыйны колавы трактар МТЗ-2 «Беларусь». А ўжо праз 20 гадоў, у лістападзе 1972-га года, на заводзе была распачата зборка мільённага трактара. Сёння тут працуе больш за 17 тысяч чалавек, а кожны дзясяты трактар у свеце зроблены на Мінскім трактарным заводзе.
На сённяшні дзень на Мінскім трактарным заводзе распрацоўваюцца і вырабляюцца не толькі колавыя і гусенічныя трактары. На базе трактароў «Беларус», выкарыстоўваючы іх вузлы і агрэгаты, арганізавана вытворчасць альтэрнатыўнай тэхнікі. Гэта мотаблокі і камунальныя машыны, транспарт для шахты, машыны для лесараспрацоўкі, пагрузачная тэхніка. На заводзе таксама аказваюць паслугі па наладжванні і правядзенні сэрвісу выпускаемай прадукцыі.
Мінскі трактарны завод даўно асвоіў замежныя рынкі. Для гэтага завод, першы сярод падобных вытворцаў у СНД, правёў сертыфікацыю выпускаемай прадукцыі адпаведна еўрапейскім стандартам. Такім чынам, на МТЗ створана сістэма якасці міжнароднага стандарту, што таксама пацвердзілася ў выніку аўдыту, які праводзілі нямецкія спецыялісты.
У жніўні 2014 года быў зарэгістраваны «МТЗ-ХОЛДЫНГ», у структуру якога сёння ўваходзіць 9 прадпрыемстваў:
Мінскі трактарны завод
Мінскі завод шасцярэнек
Віцебскі завод трактарных запчастак
Бабруйскі завод трактарных дэталяў і агрэгатаў
Мазырскі машынабудаўнічы завод
Хойніцкі завод гідраапаратуры
Смаргонскі агрэгатны завод
Лепельскі рамонтна-механічны завод
Нараўлянскі завод гідраапаратуры
Хочаце даведацца, як трактары вырастаюць з чарцяжоў у паўнацэнныя машыны? Як адбываецца зборка дэталяў і вузлоў, дзе знаходзіцца першы трактар, выпушчаны на МТЗ? Пра ўсё гэта раскажуць на вытворчай экскурсіі па Мінскім трактарным заводзе.
Наведаць трактарны завод з агляднай экскурсіяй сёння ёсць магчымасць ва ўсіх жадаючых. На ёй можна пазнаёміцца з гісторыяй завода, асаблівасцямі вытворчасці, прагуляцца па машыназборачных цэхах і прыняць удзел у працэсе зборкі, наведаць выстаўку калекцыйных трактароў і нават пракаціцца на адным з іх. Важна: дзеці на экскурсію дапускаюцца з 9-цігадовага ўзросту. Экскурсіі могуць праводзіцца на рускай, англійскай, іспанскай і нямецкай мовах.