Вузкакалейная чыгунка ў заказніку «Азёры»

Вузкакалейка ў Азёрах – частка былой торфавознай дарогі, пракладзенай у 1955 годзе да торфабрыкетнага прадпрыемства ў вёсцы Верцялішкі Гродзенскай вобласці. Гэта адна з найдаўжэйшых вузкакалейных дарог у Беларусі, яе працягласць – каля 30-ці кіламетраў, а шырыня каляіны складае 750 мм.

Калі торфабрыкетны завод у Верцялішках зачынілі, паўстала пытанне пра захаванне дарогі. У пачатку 2000-х было вырашана ператварыць азёрскую вузкакалейку ў турыстычны маршрут па тэрыторыі заказніка. Сёння незвычайная экскурсія карыстаецца папулярнасцю ў беларускіх і замежных турыстаў. Тут ужо былі госці з Кітая, Расіі, Польшчы, Германіі, Літвы. Азёрскую вузкакалейку ацэняць аматары экатурызму, дзікай прыроды і незвычайных прыгод.

Як адбываецца падарожжа?

Падарожжа ў “Азёрах” – гэта паездка на мотадрызіне з рухавіком, якая едзе з хуткасцю ад 10 да 15 км/г. Яна складаецца з некалькіх вагончыкаў з драўлянымі лаўкамі, на якіх можа змясціцца 5-6 чалавек. Працягласць маршрута – 11 кіламетраў, экскурсійная дарога займае каля дзвюх з паловай гадзін. Перад адпраўленнем усе ўдзельнікі праходзяць інструктаж па тэхніцы бяспекі. На маршруце прадугледжаны прыпынкі, каб турысты маглі агледзецца, паслухаць цікавыя гісторыі ад гіда, зрабіць прыгожыя фота.

Дарога праходзіць праз унікальны мост над маляўнічым возерам Белае – гэта адзіны ў Беларусі вузкакалейны мост. Удзельнікі экскурсіі праязджаюць праз старыя дубровы, лясныя масівы, верхавыя і нізінныя балоты. Падарожнікі маюць магчымасць сузіраць усю разнастайнасць беларускай дзікай прыроды: 200-гадовыя дубы, карабельныя сосны, пясчаныя выдмы, рэдкія птушкі, расліны, занесеныя ў Чырвоную кнігу. Па дарозе гід раскажа пра тутэйшых прадстаўнікоў жывёльнага свету, асаблівасці мясцовага ландшафту, разнастайнасць лугавой, балотнай і лясной флоры заказніка. Падарожнікі даведаюцца, як здабываюць торф, якую ролю адыгрываюць балоты ў экасістэме, сустрэнуць на шляху цікаўных жывёл.

Канцавы пункт паездкі – Святое балота – месца, якое мае важнае значэнне для беларускай гісторыі. Тут падчас паўстання пад кіраўніцтвам Кастуся Каліноўскага праходзілі жорсткія бітвы паміж царскімі салдатамі і паўстанцамі.

Што трэба ведаць падарожніку?

1. Экскурсіі адбываюцца толькі ў цёплы час года.
2. Мінімальны ўзрост удзельнікаў – 6 гадоў.
3. Перад паездкай трэба забяспечыць сябе пітной вадой, зручным абуткам і адзеннем, галаўным уборам, сродкамі ад камароў.
4. Каб дабрацца да стартавага пункту маршруту, трэба даехаць да аграгарадка Азёры, потым рухацца каля двух з паловай кіламетраў ад скрыжавання вуліц Завадской і Савецкай у бок дзіцячага лагера «Дружба».