Прамысловы турызм Мінскай вобласці

Мы зрабілі для вас падборку прадпрыемстваў Мінскай вобласці ў розных сферах, якія могуць здзівіць сваіх наведвальнікаў і наталіць смагу новых уражанняў і цікавых адкрыццяў!

ААТ «Галантэя»

Экскурсія на ААТ «Галантэя» прыйдзецца даспадобы мілым дамам. Ні для каго не сакрэт, што жанчыны маюць слабасць да ўпрыгожанняў, новых торбачак і добрага абутку.

На прадпрыемстве вы ўбачыце, як рукамі майстроў сваёй справы робіцца прыгажосць: ад партманэ, рамяня і ключніцы да торбы, партфеля і валізкі – на ўсе выпадкі жыцця. І вядома, у канцы экскурсіі вас чакае наведванне фірмовай крамы, дзе ўсе вырабы прадстаўлены па вельмі прывабных цэнах. 

Адрас: г. Мінск, вул. К.Цэткін, 18.

Слуцкія паясы

Ці ведаеце вы, што слуцкі пояс у свой час маглі сабе дазволіць нават не ўсе князі? Ці што колькасць золата ў адным творы слуцкіх майстроў магла дасягаць да 200 грамаў? Калі не, то гэтая экскурсія сапраўды для вас.

Вы даведаецеся ўсё пра ўнікальнасць слуцкіх паясоў, пра тое, як яны ствараліся ў XVIII стагоддзі і як ствараюцца зараз. У Слуцку, на радзіме гэтых цудоўных твораў мастацтва, ім прысвечаны цэлы музей. Экскурсаводы расказваюць пра іх узнікненне, віды, сімволіку. Таксама тут ёсць сувенірная крама і кафэ.

Адрас: г. Слуцк, вул. М. Багдановіча, 8.

Белмастацкераміка

У рамках гадзіннай экскурсіі на Белмастацкераміцы вы ўбачыце поўны цыкл вытворчасці, ад бясформеннага кавалачка гліны да роспісу гатовага вырабу, даведаецеся пра гісторыю прадпрыемства і разгледзіце керамічны посуд, выраблены тут пачынаючы з 1940-х і да сённяшняга дня.

Жадаючыя паўдзельнічаюць у майстар-класе па лепцы і змогуць забраць дадому створаны сваімі рукамі сувенір. І вядома ж, вы не зможаце прайсці міма фірмовай крамы, каб захапіць з сабой нешта на памяць.

Адрас: Мінская вобласць, Маладзечанскі раён, г.п. Радашковічы, вул. Савецкая, 12.

Вінакурня «Нарач»

Наведванне Вінакурні Нарач – гэта зачаравальнае і займальнае падарожжа, якое не пакіне вас абыякавымі. Пабываўшы ў гістарычным будынку Вінакурні, якой ужо больш за 175 гадоў, вы даведаецеся аб яе развіцці ад самых вытокаў да сённяшняга дня. Тут вас пазнаёмяць з асаблівасцямі вытворчасці моцных спіртных напояў, а таксама вы зможаце зазірнуць у сучасныя вытворчыя цэхі.

Завершыцца экскурсія дэгустацыяй алкагольных напояў. І калі захочаце набыць бутэлечку-іншую, зможаце зрабіць гэта ў фірмовай краме Вінакурні. Узроставае абмежаванне 18+.

Адрас: Мінская вобласць, Мядзельскі раён, аг. Нарач, вул. Завадская, 58. 

Мы пералічылі далёка не ўсе аб'екты, дзе можна пабываць на вытворчай экскурсіі ў Мінскай вобласці. Аднак, калі вы думаеце над варыянтам незвычайнага вольнага часу ўсёй сям'ёй або з калегамі, выбірайце прамысловы турызм. І, мы спадзяёмся, наша падборка самых цікавых прапаноў будзе карыснай і дапаможа вызначыцца вам з відам вытворчасці і фарматам экскурсіі.