Сёння мы б хацелі распавесці Вам пра ціхі беларускі горад з багатай гісторыяй. Маладзечна − горад на рацэ Уша, які варта наведаць!
Цікавыя факты:
- 1. Па адной з версій, назва «Маладзечна» паходзіць ад слова «малайчына». У Старажытнай Русі так называлі байцоў княскай дружыны.Па іншай версіі, горад атрымаў сваю назву ад мясцовай рачулкі Маладачанкі.
- Мы не зманілі, калі казалі, што ў Маладзечна багатая гісторыя. Упершыню горад згадваецца ў прысяжных грамаце 1388 года.
- Маладзечанскія землі калісьці набыў Леў Сапега. А пасля яго ўладальнікам стаў сам Міхал Агінскі!
Што паглядзець? Куды схадзіць?
Цяпер у Маладзечне жыве больш за 100 тыс. чалавек, таму не сумнявайцеся: тут ёсць усе ўмовы для камфортнага адпачынку і выдатнана шпацыру!
Цэнтральная Плошча
Немагчыма прайсці міма сэрца горада. На Цэнтральнай плошчы знаходзіцца фантан, упрыгожаны скульптурамі. Ён ужо прыйшоўся даспадобы аматарам рабіць фатаграфіі.
Пешаходная вуліца Прытыцкага
Мясцовыя жыхары называюць гэтую вуліцу «Брадвей». Гэта цэнтральная вуліца, якая злучае чыгуначны вакзал і Цэнтральную плошчу, даўно з'яўляецца адным з улюбёных месцаў баўлення часу. Тут вы знойдзеце розныя крамкі, зможаце смачна падмацавацца ў кавярні або піцэрыі.
Аднапавярховы будынак вакзала быў узведзены ў 1907 годзе і захаваўся да нашых дзён. Цікава, што ў 1915 сюды прыязджаў цягнік галоўнакамандуючага рускай арміяй імператара Мікалая ІІ. Ён узнагародзіў байцоў за вызваленне Вілейкі і Маладзечна.
Мемарыяльны комплекс «Шталаг - 342»
Гэты комплекс прысвечаны ахвярам канцлагера, які калісьці тут існаваў. Фашысты зганялі сюды ўсіх, хто хоць неяк не дагадзіў ім. Усяго ў лагеры «Шталаг - 342» было забіта больш за 30 тыс. вайскоўцаў і мірных жыхароў.
Забавы:
- Мінскі абласны тэатр лялек «Батлейка» заўсёды рады новым наведвальнікам. Тэатр арыентуецца на старадаўнія традыцыі беларускага мастацтва. У гэтым рэчышчы і фарміруецца рэпертуар. За больш як 30 гадоў працы ў тэатры было ажыццёўлена каля 40 розных пастановак.
- Мінскі абласны краязнаўчы музей створаны ў 1959 годзе. Зараз у музеі ладзяцца экскурсіі і лекцыі. Музей пагрузіць Вас у гісторыю паходжання Мінскай вобласці са старажытных часоў і да нашых дзён.
- Аматарам пракаціцца на водных горках або проста паплаваць у басейне прапануем зазірнуць у маладзечанскі аквапарк.
- Сярод забаў Вы таксама знойдзеце кінатэатр «Радзіма», які знаходзіцца прама на пешаходнай вуліцы Прытыцкага.
Дзе падмацавацца?
Фо-Бо.
Рэстаран, які здзівіць Вас сваёй аўтэнтычнай кухняй. Вы можаце замовіць і пакаштаваць стравы з кітайскай, французскай і в'етнамскай кухняў. Тут вельмі незвычайны дызайн, сучасны і прыязны персанал.
Two Moods.
Вы не пашкадуеце, калі зазірняце сюды пасля шпацыру па краязнаўчым музеі. У кавярні вельмі ўтульна і спакойна. Яна славіцца сваёй смачнай кухняй і модным дызайнам інтэр'еру.
Sabroso Лацінабургер.
Самыя смачныя бургеры ў Маладзечне гатуюць менавіта ў гэтай кавярні. Наведвальнікі адзначаюць вялікі выбар і дэмакратычныя кошты.
Маладзечна − горад, з якога не хочацца з'язджаць! Тут ёсць усё, каб адпачыць ад гарадской мітусні. У паветры вее спакоем і камфортам. У горадзе заўсёды знойдзецца ўтульная мясціна, каб застацца сам-насам са сваімі думкамі або падмацавацца пасля доўгага шпацыру.