Топ-15 месцаў Беларусі, пра якія вы не ведалі

15. Парк гісторыі «Каралеўская Асамблея Сула» (в. Сула, Стаўбцоўскі раён)

Кожная зона парку прысвечана гістарычнай эпосе: ад паганскай старажытнасці да часоў шляхецкай славы. Можна пастраляць з лука, пакідаць сякеры, паспрабаваць сілы ў кавальскай справе, прадэгуставаць старку, а на Купалле – паскакаць праз вогнішча і пабегаць са схілу за падпаленымі коламі!

14. Беларуская Карэлія пад Клімавічамі

Мабыць, самая прыгожая варыяцыя вядомых крэйдавых кар’ераў – «беларускіх Мальдываў». Вада не такая блакітная, як у Ваўкавыскіх і Крычаўскіх, але затое берагі здзіўляюць маляўнічымі бярозавымі гаямі і хваёвымі зараснікамі. Не забудзьце фотаапарат!

13. Паромная пераправа праз Дзісну

Калі яшчэ не перапраўляліся на пароме, то заязджайце ў Дзісну – самы маленькі горад Беларусі. 15 разоў у дзень ходзіць паром праз раку да вёскі Луначарскае.

12. Фіёрды вёскі Глушкавічы

Месца, так падобнае на Скандынавію, але па факце – затопленыя Палескія гранітныя кар’еры. Спойлер: ад гэтага яны выглядаюць не горш!

11. V форт у вёсцы Гершоны (4 км ад Брэста)

Добра захаваны пяцівугольны форт ХХ стагоддзя, нават з ровам. Можна агледзець з экскурсіяй, а можна і самастойна.

10. Магільны склеп Ажэшкі (в. Закозель)

XIX стагоддзе, вельмі гатычна і сярдзіта, а галоўнае – не збіта. Магільны склеп закінуты, але захаваўся дастойна, ёсць, чым палюбавацца.

9. Воданапорная вежа-музей у Полацку

Вышыня, як у 11-павярховага дома, усярэдзіне – музей прыроды і экалогіі. Бясплатны бонус – захапляльныя віды і панарамы з вышыні (як мінімум, са шкляной лесвіцы).

8. Конныя прагулкі ў Бярэзінскім біясферным запаведніку

Калі раней былі з экскурсіяй – не бяда. Паскакаць на кані па балотах – зусім новыя адчуванні. Свежа, маляўніча, экстрэмальна.

7. Брэсцкі музей чыгуначнай тэхнікі

Мара ўсіх хлопчыкаў ад 2 год да бог ведае якога ўзросту. Паравозы, цеплавозы, лакаматывы, чыгуначнае абсталяванне (званы, гадзіннікі розных эпох, вагоны, паравозныя краны). А калі сказаць, што палова экспанатаў дзеючая і выкарыстоўваецца на здымках фільмаў?..

6. Палац Умястоўскіх (в. Жамыслаўль)

Закінутая казачная сядзіба пасля пажару. Пры жаданні можна агледзець і ўнутры, і звонку.

5. Дайвінг на возеры Рычы (Браславы)

Нечакана, праўда? Празрыстасць вады да 5 м, рэліктавыя жыхары з Чырвонай кнігі – тое, што робіць месца цікавым для дайвераў.

4. Балота Ельня

Лепш наведваць восенню, але асцярожна – можна пакінуць сваё сардэчка ў гэтым буянстве фарбаў, бегаючы ў балотаступах па твані, як сапраўдны вадзянік, або вывучаючы экасцежкі.

3. Музей «Выратаваныя мастацкія каштоўнасці» (Брэст)

Экспанаты, знойдзеныя мытнікамі ў тайніках пры спробе незаконнага правозу праз мяжу. Незразумела, што здзіўляе больш: мастацкая каштоўнасць экспанатаў або гісторыі пра тое, як іх хавалі! І тое, і другое можна вывучыць тут.

2. Бункер «Аб’ект 1161»

Так, сапраўдны звышсакрэтны бункер часоў Халоднай вайны, самі ў шоку. Бягом глядзець, пакуль не разваліўся!

1. Начное сафары на Браслаўскіх азёрах

Памчацца на змярканні на ўазіку з лесніком насустрач дзікай прыродзе і начным жыхарам лесу – што можа быць больш экстрэмальным? Неверагодна, але факт: такая паслуга даступная ў нацыянальным парку «Браслаўскія азёры».

Упэўненыя, што хаця б 5 месцаў з рэйтынгу вас прывабілі. Далей справа за малым: выбірайце свабодныя выходныя і наперад, насустрач прыгодам!