Магілёў

Гэты абласны цэнтр, па вулачках якога варта прагуляцца. Вядомы беларускі этнограф Іван Луцкевіч назваў некалі гэты цудоўны горад «беларускай Прагай». Славутасці тут на кожным кроку: чыгуначны вакзал, драматычны тэатр, Свята-Нікольскі манастыр, плошча Зорак, гарадская ратуша.

Свята-Нікольскі манастыр

Карацей, калі вы спіце і бачыце, як акунуцца ў гісторыю і атмасферу мінуўшчыны, то вам дакладна ў Магілёў!

Мемарыяльны комплекс «Буйніцкае поле»

Помнік прысвечаны героям Вялікай Айчыннай вайны, якія ў 1941 годзе адважна ваявалі за Радзіму пад Магілёвам. Па некаторых звестках абаронцаў было каля 30 тысяч чалавек, аднак імёны многіх так і не атрымалася вызначыць.

Буйніцкае поле

Галоўны аб'ект комплексу – капліца вышынёй з дом на дзесяць паверхаў, усярэдзіне якой размешчаны фрэскі са спісамі загінулых воінаў. Тэрыторыя «Буйніцкага поля» вялікая і ўмяшчае ў сябе дагледжаны парк, вадаём і выставу вайсковай тэхнікі.

Палац Булгакаў у Жылічах

Палац належаў Ігнацію Булгаку, які некалі служыў у рускім войску і ўдзельнічаў у вайне з Напалеонам. Палацавы ансамбль складаўся з вялікага парка, аранжарэі, басейна, фантана, шматлікіх скульптур, а інтэр'ер палаца мог здзівіць нават самых багатых людзей XIX стагоддзя. Пасля смерці Ігнація палац перайшоў ва ўладанне яго малодшага сына, але на гэтым гісторыя будынка не сканчаецца…

Палац Булгакаў у Жылічах

Больш падрабязна пра гэты прыгожы маёнтак вы зможаце даведацца, калі наведаеце нядаўна адрэстаўраваны музей. Сам палац – гэта толькі малая частка гісторыі, сапраўдныя моманты мінулага заключаны ў прадметах, якія знаходзяцца ўсярэдзіне палаца Булгакаў у Жылічах.

Крычаў

Горад, што размясціўся на рацэ Сож, прыцягвае да сябе ўсё больш і больш турыстаў. І на гэта ёсць важкія прычыны. Па-першае, гэта адзін з найстарэйшых гарадоў Магілёўшчыны, які ўпершыню згадваецца ў XII стагоддзі. Па-другое, Крычаў можна назваць цэнтрам, у якім знаходзяцца адразу некалькі цікавых славутасцяў. Палац Пацёмкіных са сваімі ўпрыгожаннямі заўсёды чакае наведвальнікаў, якія жадаюць прагуляцца па прасторных залах палаца. Паштовая станцыя, пабудаваная ў XIX стагоддзі, з'яўлялася важным аб'ектам для Расійскай дзяржавы. Яе атрымалася захаваць да нашых дзён. Гэта помнік у неагатычным стылі, які падасца цікавым абсалютна ўсім. Акрамя архітэктурных шэдэўраў, якія знаходзяцца ў Крычаве, мы рэкамендуем наведаць Пятрову крыніцу на ўскраіне горада. Сваю назву яна атрымала з-за таго, што некалі з яе піў Пётр I. Хто ведае, можа, менавіта гэта вада дапамагла імператару здабыць так шмат перамог у бітвах супраць ворагаў.

Крычаў

Усходняя Беларусь – рэгіён кантрастаў. Тут ёсць развітая інфраструктура, але ў той жа час ёсць пачуццё нейкай адасобленасці і яднання са светам, з гісторыяй, з самім сабой. Вядома, спіс славутасцяў Магілёўскай вобласці на гэтым не сканчаецца. Падарожнічайце і вывучайце гісторыю нашай краіны!