У пошуках прыгод

Другі дзень семінара працягнуўся ў Гродна.  Удзельнікі мерапрыемства разгледзелі асаблівасці падзейнага турызму на прыкладзе XIV Рэспубліканскага фестывалю нацыянальных культур. У рамках адкрыцця свята намеснік старшыні Гродзенскага аблвыканкама Віктар Пранюк наведаў выставачныя стэнды, размешчаныя ў Новым замку.

Беларусь вачыма турыста

Прадстаўнікі Нацыянальнага агенцтва па турызме расказалі аб маштабах працы, праведзенай ў галіне турызму, аб развіцці турыстычнага патэнцыялу, а таксама аб новых сэрвісах і паслугах, якія дазваляюць турыстам скласці цікавы маршрут свайго падарожжа.

Наведвальнікі прэзентацыі не толькі даведаліся пра значныя турыстычныя аб'екты, але і адкрылі для сябе новыя прывабныя пункты на карце Беларусі. На пляцоўцы Нацыянальнага агенцтва па турызме былі прадстаўлены карысныя выданні для падарожнікаў, праводзіліся віктарыны і майстар-класы.

Акрамя таго, кожны раён Гродзеншчыны быў прадстаўлены турысцка-інфармацыйнымі цэнтрамі. Іх прадстаўнікі пазнаёмілі наведвальнікаў са знакавымі славутасцямі сваіх рэгіёнаў. Многія з іх ужо не першы год прыцягваюць не толькі беларускіх, але і замежных падарожнікаў.

Падарожжа за эмоцыямі

Дыялогавая пляцоўка «Падарожжа за эмоцыямі: падзейны турызм у Беларусі» стала заключнай падзеяй выязнога семінара «Падзейны турызм у Беларусі» і падвяла вынікі двух дзён плённай працы і цікавых сустрэч.

Мадэратарам выступіў дырэктар Нацыянальнага агенцтва па турызме Дзмітрый Марозаў. У дыялогу прынялі ўдзел прадстаўнікі дзяржаўных органаў і спецыялісты сферы турызму. Удзельнікі абмеркавалі вопыт арганізацыі і правядзення вядомых падзейных мерапрыемстваў, а таксама перспектывы навінак турыстычнага сезона-2024.

На актуальныя пытанні індустрыі звярнула ўвагу намеснік дырэктара Нацыянальнага агенцтва па турызме Ганна Вашчынчук. Яна закранула такія тэмы, як ідэнтычнасць мерапрыемстваў і іх асвятленне, інфраструктура, спалучэнне традыцый і інавацый.

Аб развіцці падзейнага турызму ў рэгіёне распавяла намеснік начальніка ўпраўлення спорту і турызму Гродзенскага аблвыканкама Таццяна Лідзяева. Паводле яе слоў, на Гродзеншчыне імкнуцца ўлічваць узрастаючыя патрабаванні падарожнікаў і прапаноўваюць цікавыя навінкі, а таксама ўкараняюць у экскурсіі элементы шоу і інтэрактыву. Характэрна, што больш за 300 аб'ектаў вобласці падключыліся да рэспубліканскай акцыі «Вандруй. Адчуй. Натхняйся». Адной з яркіх навацый сезона Таццяна Лідзяева назвала маршрут «Даступная гісторыя Ваўкавыска» – гэта яркі прыклад развіцця інклюзіўнага турызму. Ён дае магчымасць пазнаёміцца са славутасцямі горада людзям з абмежаванымі магчымасцямі здароўя.

А вось сярод лідараў экспарту турыстычных паслуг выступае Віцебская вобласць. Значную ролю ў прыцягненні гасцей у рэгіён адыгрывае Міжнародны фестываль мастацтваў «Славянскі базар у Віцебску».

На канкрэтных прыкладах удзельнікі семінара даказалі, што падзейны турызм у Беларусі набірае папулярнасць і дазваляе прыцягнуць увагу да рэгіёнаў, раскрыць іх патэнцыял.